សម្ដេច ហ៊ុន សែន ដាក់ចេញវិធានការក្ដៅចំនួន ៥ ដើម្បីទប់ស្កាត់ជំងឺកូវីដ១៩ បំប្លែងខ្លួនថ្មីមានប្រភពពីឥណ្ឌា
នៅព្រឹកថ្ងៃទី១ ខែកក្កដា ឆ្នាំ២០២១ នេះ សម្ដេចតេជោ ហ៊ុន សែន នាយករដ្ឋមន្រ្ដីនៃព្រះរាជណាចក្រកម្ពុជា បានដឹកនាំកិច្ចប្រជុំ និងថ្លែងសារពិសេសដោះស្រាយបញ្ហាជំងឺកូវីដ១៩ ដែលកំពុងរីករាលដាលនៅក្នុងប្រទេសកម្ពុជា តាមប្រព័ន្ធវីដេអូ។ ដោយនៅក្នុងកិច្ចប្រជុំនេះសម្ដេចបានដាក់ចេញ នូវយុទ្ធសាស្រ្តទី១ ដោយមានវិធានការចំនួន ០៥ ឲ្យអនុវត្ដដើម្បីទប់ស្កាត់ជំងឺកូវីដ១៩ បំប្លែងខ្លួនថ្មីកើតមានឡើងនៅក្នុងប្រទេសកម្ពុជា។ នេះបើតាមការដកស្រង់ពីទីភ្នាក់ងាសារព័ត៌មានកម្ពុជា AKP ។
វិធានការទាំង ៥ នោះរួមមាន៖
១. ពង្រឹងការគ្រប់គ្រងនៅតាមច្រកព្រំដែន ឱ្យបានម៉ត់ចត់បំផុត
២. ការធ្វើតេស្តរហ័ស គឺត្រូវធ្វើនៅតាមបណ្តាព្រំដែនទាំងអស់ (ករណីសង្ស័យ ត្រូវប្រើម៉ាស៊ីនធំ) ហើយក្នុងមួយខេត្តត្រូវផ្តល់ជូនឧបករណ៍តេស្តរហ័សនេះ យ៉ាងហោចណាស់ ១ម៉ឺនឧបករណ៍តេស្តរហ័សនេះ ខណៈឧបករណ៍នេះមានចំនួននៅសល់ប្រហែល ៨០ម៉ឺន ហើយបានបញ្ជាទិញចំនួន ១លានទៀត។
៣. ការធ្វើចត្តាឡីស័កឱ្យបានត្រឹមត្រូវ ពង្រឹង និងផ្គត់ផ្គង់សម្ភារឱ្យបានគ្រប់គ្រាន់ ជាពិសេសខេត្តនៅតាមព្រំដែនថៃ ដោយសារយើងមានពលករយើងច្រើន
៤. ដាក់ឱ្យព្យាបាលដោយឡែក សម្រាប់អ្នកវិជ្ជមានពពួកបំប្លែងខ្លួន (ដែលតា និងដែលតាផ្លាស) ហើយករណីនេះ ត្រូវធ្វើចត្តាឡីស័កចំនួន ២១ថ្ងៃជាដាច់ខាត។
៥. បងប្អូនជនរួមជាតិដែលជាពលករនៅប្រទេសថៃ (ទាំងស្របច្បាប់ និងមិនស្របច្បាប់) សូមកុំព្រួយបារម្ភ ដោយកម្ពុជា បានធ្វើការសហការជាមួយភាគីថៃរួចហើយពាក់ព័ន្ធនឹងបញ្ហានេះ។
សូមជម្រាបផងដែរថា គិតត្រឹមខែមិថុនាកន្លងទៅនៅកម្ពុជាយើង ប្រភេទវីរុសបំប្លែងថ្មី(B.1.617.2) ដែលមានប្រភពមកពីឥណ្ឌា (Delta) បានរកឃើញចំនួន ២២ករណីហើយនៅទូទាំងប្រទេស ដែលភាគច្រើនអ្នកវិជ្ជមានកូវីដ១៩ប្រភេទនេះ បានរកឃើញលើបងប្អូនពលករដែលត្រលប់មកប្រទេសកំណើតវិញ តាមច្រកព្រំដែនកម្ពុជា-ថៃ៕
