គួរតែដឹង! នេះជាផ្កាស៊ីសាច់ជាអាហារ ឈ្មោះ «ផ្កាបំពង់ក្រឡោម» មាន ៥ ប្រភេទនៅកម្ពុជា…
តាមរយៈការសិក្សារបស់អ្នកជំនាញ ផ្កាបំពង់ក្រឡោម បំពង់ស្រមោច ឬ អ្នកខ្លះហៅថា «ផ្កាបំពង់លុក» ឬ «ផ្កាក្រឡូមពារ» ជាភាសាបច្ចេកទេស Pitcher plants (Nepenthes) គឺជាពពួករុក្ខជាតិស៊ីសាច់ ដែលគេបានដឹងតិចតួចណាស់នៅកម្ពុជា ។ គេអាចហៅវាថាជារុក្ខជាតិស៊ីសាច់ ព្រោះវាអាចចាប់សម្លាប់ និង រំលាយសត្វដែលចូលទៅក្នុងទម្រង់ស្លឹកពិសេសរបស់វា ។
បើតាមការឱ្យដឹងពី រដ្ឋលេខាធិការនៃក្រសួងបរិស្ថាន នៅលើពិភពលោក ផ្កាបំពង់ក្រឡោមនេះ មានដល់ទៅ ១២៩ ប្រភេទ ដែលក្នុងនោះមាន ៥ ប្រភេទបាន និង កំពុងដុះលូតលាស់នៅប្រទេសកម្ពុជា ដែលរួមមាន ៖
ទី១. Nepenthes bokorensis ជាប្រភេទដែលមានវត្តមាននៅ តំបន់ភ្នំពពកវិល វាលស្រែ ៥០០ វាលស្រែ ១០០ នៃឧទ្យានជាតិព្រះមុនីវង្ស «បូកគោ» ។
ទី២. Nepenthes holdenii មានដុះនៅតាមតំបន់ភ្នំនៃភាគនិរតីប្រទេសកម្ពុជា ដូចជានៅតាមតំបន់ជួរភ្នំក្រវាញ ជាដើម ។
ទី៣. Nepenthes kampotiana Lecomte មានដុះនៅក្នុងខេត្តកំពត ដែនជម្រកសត្វព្រៃភ្នំសំកុស និង នៅតាមតំបន់ជួរភ្នំក្រវាញ ។
ទី៤. Nepenthes mirabilis (Loureiro) Druce មានដុះនៅខេត្តកំពត ខេត្តកែប និង ខេត្តព្រះសីហនុ ។
ទី៥. Nepenthes smilesii Hemsley មាននៅដុះខេត្តកំពត និង ឧទ្យានជាតិព្រះសុរាម្រិតកុសុមៈ «គិរីរម្យ» នៃខេត្តកំពង់ស្ពឺ ។
គួរឱ្យដឹងផងដែរថា ផ្កាបំពង់ក្រឡោម ជាប្រភេទរុក្ខជាតិម៉្យាងមានរាងដូចបំពង់ ហើយផ្ទុកសារធាតុម្យ៉ាងដែលអាចទាក់ទាញសត្វល្អិតឱ្យធ្លាក់ចូលទៅក្នុងបំពង់របស់វា ហើយក៏លង់ទឹកក្នុងបំពង់នោះរហូតដល់ស្លាប់ ។
នៅពេលសត្វល្អិតងាប់ហើយនោះ សរីរាង្គពិសេសរបស់វាក៏ចាប់ផ្ដើមបំបែករំលាយសាកសពសត្វល្អិតទៅជាសារធាតុចិញ្ចឹម ធ្វើឱ្យរុក្ខជាតិប្រភេទនេះលូតលាស់បានល្អ ៕ ប្រភព ៖ Ministry of Environment រូបភាពដោយ ៖ ឆែម ប៊ុនធឿន
